政情：陳國基求學幾份兼職
新任入境處一哥陳國基，喺八十年代讀樹仁書院（現名樹仁大學）嗰陣，原來已經好勤力，做幾份兼職，除咗幫人補習、教結他外，仲喺馬會做電話投注員，四年內連升四級，由投注員做到中心主管，仲為過千名職員提供培訓同編更表，做兼職做到升職，真係一啲都唔講得笑！
陳Sir最近接受樹仁班師弟妹訪問，就分享自己嘅成功秘訣。佢話，最緊要就係唔好怕蝕底，因為怕蝕底嘅人先至最蝕底，點解咁講？皆因陳Sir揀人升職，會揀一啲唔怕蝕底嘅，連星期六都肯超時工作，一定優先晉升喎。
陳Sir又話，雖然入境處係紀律部隊，但佢絕對唔會板起臉口對啲同事，但對自己愛女就好嚴格。佢童年住喺屋邨，兄弟姊妹又多，父母冇時間管教佢哋，成長過程亦影響佢管教女兒嘅哲學，乖女細個嗰陣要向長輩跪低斟茶，食飯嗰陣要先夾餸畀其他人，結果乖女冇令爸爸失望，入咗港大讀法律，真係虎父無犬女。