政情：劉燕卿街市格價捱鬧
消費者委員會總幹事劉燕卿（Connie）已經入職三十七年，絕對係消委會嘅開國功臣，原來佢入職後首項任務就係去街市格價，認真有趣。Connie趁住尋日母親節，帶埋媽媽同囡囡上電台接受訪問，講起消委會工作，佢話當年畢業冇幾耐就加入消委會做研究及普查主任，當時每日晨早要落街市做食品格價，最常做就係豬牛肉價格。
Connie憶述，當時街市檔位冇豎立食品價錢牌，每次問完價都混吉唔幫襯，令到檔主經常惡言相向，佢坦言自己已經算好彩，事關當時有個女同事格價時竟然畀檔主潑牛血，依家諗起都覺得對方好慘喎！不過，Connie就醒嘞，諗到搵阿媽傍住，每日趁阿媽去買餸時順便格價，由於阿媽會有幫襯，所以佢格價時遭受嘅待遇亦好得多。
三十七年嘅消委會生涯，Connie印象最深刻係○六年嘅PAAG注射隆胸大踢爆，因為嗰期調查影響深遠，而且該期《選擇》月刊更係唯一一期要包膠袋，所以認真特別喎。