政情：范太否認逼中央表態
全國人大常委范徐麗泰日前公開話要「玩多兩個月」，先會交代係唔係參選下屆特首，范太呢番言論喺政壇引來不少討論。對於有人指范太公開講參選特首問題，目的係想逼中央表態，范太尋日接受電視台訪問時澄清，話自己絕對冇呢個意圖，亦唔明點解人哋會咁講；又話如果有佢認為合適嘅人參選特首，佢會自動退出喎。
有合適人選 會自動退出
范太解釋，佢之所以話要考慮多兩個月，完全係想清晰咁思考自己有乜嘢弱點，以及考慮自己身體狀態能否應付到特首呢一項咁沉重同重要嘅工作。范太仲提到，自己喺一個情況下會退出競逐特首，就係有人喺佢決定前行出來話參選，而呢個人亦係佢內心認為合適嘅人選，咁佢就會自動退出喇！
不過，范太被問到邊個係佢心目中嘅合適人選時，范太就話已經講夠喇，所以決定封嘴，唔再答呢個問題喎。至於當日為何一口氣連續答咗記者廿幾條關於參選特首嘅問題，范太覺得如果一下子拒絕回應記者提問，會唔係幾好意思，所以先至傾咁耐。