政情：工商界借弱勢Greg蘇打冧競爭法
商務及經濟發展局局長劉吳惠蘭因病辭官至今已一個月，但蜀中無大將，搵人填位並唔容易，近日更有傳港府揀無可揀，焗住搵副局長蘇錦樑（Greg）頂上。阿Greg處理競爭法嘅表現劣評如潮，更因為只識耍官腔而搞到同工商界嘅關係勢成水火。不過，政治一日都嫌長，如今阿Greg有望「上位」，最開心嘅竟然係呢班日夜鬧爆佢嘅工商界，此話何解？
工商界一直不滿阿Greg處理競爭法嘅手法，質疑佢律師出身一味照抄外國法例、唔明工商界憂慮、凡事太「驚青」，只識耍官腔。草案審議期間，工商界更一度將阿Greg架空，最終迫使其前上司劉吳惠蘭親自介入，並將有關工作轉畀其他公務員同事主理。
不過，隨着草案審議逐漸進入「埋牙」階段，工商界卻一改態度，想向阿Greg黃袍加身，事關佢哋貪阿Greg好恰兼缺乏公務員撐腰，輕則可以逼到佢作出讓步，重則押後甚至撤回整條草案，對佢哋百利而無一害。
坐正不利民記選情
對於阿Greg「水鬼升城隍」，佢所屬嘅政黨民建聯無法戥佢開心之餘，更係憂心忡忡。民記一直希望有黨員出任問責局長，以示該黨有執政能力，當初推薦時任副主席阿Greg做副局長，無非都寄望佢終可「坐正」。可惜，隨着佢加入政府後屢爆醜聞，表現缺乏政治智慧，該黨早已對佢失去信心。
有知情人士話，如果阿Greg喺現時情況下出任局長，外界會當佢係「次選」，甚至「次次選」，個黨一啲金糠都沾唔到，加上區議會臨近，明年又到立法會選舉，無論泛民主派或是針對競爭法嘅工商界，必定會借故圍攻佢，最終只會影響民記選情及該黨喺下屆政府推薦局長人選嘅大計。
唔知係咪有感擺阿Greg上枱「有利可圖」，白鴿黨李華明尋日亦力撐阿Greg坐正。佢話喺冇人選嘅情況下，搵阿Greg坐正會係一個可以接受嘅安排，而該局兩位常任秘書長都好能幹，相信阿Greg有乜甩漏都會幫佢補番晒喎。面對內憂外患，睇怕阿Greg上到位都好難有運行喇！