母親節活動多籮籮，香港紅十字會主席楊鐵樑（圖左）同新抱楊余夏卿（圖右）尋日孖住參加自己嘅新書發布會，向大家推介《品味英語》系列及《煲煲好》兩套新作，同場仲有紅十字會總監胡郭秀萍（圖中）。今次活動最特別之處，係賣書收益會撥捐畀「香港紅十字會總部大樓重建計劃」。紅十字會新總部位於西九龍，樓高十一層，預計二○一四年落成，建成後相信可以幫到更多有需要人士。
