中環出更：李文斌捐錢撐殘疾有段古

斌仔坐鑽的遊迪士尼

講開殘疾人士，四肢癱瘓生命鬥士鄧紹斌（斌仔）尋日獲香港迪士尼樂園贊助，免費坐無障礙的士「鑽的」由屋企直接到樂園遊玩，同父母度過愉快母親節。斌仔坦言，由於要用輪椅代步，出街好唔方便，平時最多都係出去睇醫生，好少機會可以同媽媽出去玩，所以尋日特別興奮。鄧媽媽都話，以前多數喺醫院同斌仔食飯傾偈，所以斌仔事前好緊張，前晚仲多次提醒佢同爸爸早啲起身，千祈唔好遲到！當日接載斌仔到迪士尼樂園嘅「鑽的」公司，嚟緊會積極游說戲院及卡拉OK提供贊助，希望為輪椅人士提供娛樂節目。