中環出更：政界名人派禮 歡度母親節
母親節，慶祝節目花款多。政界名人尋日齊出動，自由黨主席劉健儀（Miriam）帶隊落區派番梘；立法會議員謝偉俊（Paul）就話媽咪身在美國，要搵親密愛人白韻琴做「代母」，言論激到白姐姐臉燶燶；立法會議員李慧琼（Starry）就一日連跑三場活動，搞到囡囡扁嘴投訴。一句講晒，媽咪唔易做！
Miriam未有趁母親節休息，尋日相約副主席方剛等人，喺大埔向市民派發小禮物，四百舊番梘，廿分鐘就派晒。Miriam話，朝早已收到囝囝越洋送贈嘅鬱金香同百合花，甜在心頭。佢下星期會飛過美國，出席囝囝第二個學位畢業禮，順便補祝母親節，認真Happy。
轉過頭，卓妮喺奧海城遇見阿Paul同李華明齊扮大肚婆，又捲起衫袖為「假BB」換尿片、沖涼，體驗做媽咪嘅辛勞。
阿Paul當白姐姐係「代母」
阿Paul冇小朋友，但為免失禮，活動前專登買包尿片匿埋屋企練習。卓妮問佢幾時生仔，白姐姐搶住答話：「我唔介意湊小朋友，但要生就叫阿Paul搵代母，最好生個混血BB。」阿Paul食住上搞Gag，話自己媽咪唔喺香港，要暫時當白姐姐係「代母」，暗寸對方年紀大，激到白姐姐臉燶燶。
同場仲有行政會議成員劉皇發千金劉玉蓮，佢拍住老公、信和集團總經理余漢坤示範湊BB，手勢純熟，佢哋嘅四歲囝囝就喺台下打氣，一家三口好合拍。
另一邊廂，Starry都忙到無暇慶祝母親節。尋日佢同一班單親媽咪現身電台，佢話當年老公被派駐內地一年，佢母兼父職照顧囡囡，有次喺餐廳食飯時，囡囡想去廁所，佢拎埋手袋陪囡囡如廁，出來時發現枱上食物被清走，侍應仲誤會佢想食霸王餐，鬼咁尷尬，事件令佢覺得，單親媽咪生活處處碰壁，好需要人支援喎。
卓妮