驚慄車廂乘客搖骰仔
【本報訊】「我見到架貨櫃直插埋嚟，咪即刻抓實扶手，好彩只係撞傷鼻，但其他人就冇咁幸運，好多人跌低東歪西倒，車廂地下血漬斑斑，一片狼藉，列車一停，大家就好驚咁蜂擁落車」，親歷輕鐵被撞意外的乘客朱先生，講述意外時仍猶有餘悸。
乘客指櫃車衝燈肇禍
朱先生表示，出事時坐在頭位，全部座位也坐滿人，十多人則站立。輕鐵駛過十字路口期間，已見到貨櫃車從遠處急衝而至，他估計會撞埋輕鐵車身，隨即雙手抓緊扶手防患未然，未幾貨櫃車已插埋車身。他感到車卡向一邊移動，鼻子不慎撞及車身受傷。出事後大家「
嘩鬼叫」混亂不堪，有人失平衡跌落地下東歪西倒，有人撞穿頭浴血。因此，列車一停下，大家即急不及待逃離車廂，幸好消防人員快速趕抵救人。
目擊車禍的姓鄭（十六歲）中四男生稱，「見到架貨櫃車直插埋輕鐵嗰陣，完全冇收到油，車速好快，連胎痕都冇，輕鐵被撞後車頂好似着火咁，閃出『啪啪』聲嘅火花，好像爆炸一樣。」另一名老伯則謂，貨櫃車速度很快，撞到輕鐵後發出巨大響聲，車卡被其撞致左搖右擺，應該是貨櫃車衝紅燈引發意外。
