違泊阻小巴警方懶執法
沙田碩門邨入口早上七時至八時時段平日常有私家車違泊，警方被指「唔踢唔郁」懶於執法！李先生指上址為專線小巴站，估計因鄰近學校正門，吸引車主將車輛停泊方便接送子女。「啲私家車泊晒喺度，小巴就逼住要喺路中心上落客，警察又唔理，有冇搞錯！」李又指曾向警方反映問題，惟情況未見改善。
警方發言人證實，上址為安明街專線小巴站，沙田警署一直有派員在上址對違泊車輛進行票控。
「我只係見警察嚟抄過一次牌，之後啲車咪又泊番晒喺度，離晒譜！」李先生坦言對警方的例行回應大表不滿。
「警方淨係應酬式咁抄一次牌邊有用，可唔可以同運輸署傾下有冇辦法解決？」沙田區區議員劉偉倫狠批警方處理違泊有欠主動，間接增加路面負荷，無視市民安全。