政情：楊鐵樑夢想做美總統
人稱「楊官」嘅前最高法院首席大法官楊鐵樑，喺法律界嘅地位同成就眾所周知，佢尋日就自爆自己兒時夢想，竟同法律扯不上丁點關係，仲要去到廿七、廿八歲誤打誤撞先發掘到做法官呢個夢想。到依家佢已經八十二歲，退休享清福之餘，楊官就自嘲夢想只是「安樂死」，「希望死嘅時候平平安安！」咁話喎。
楊官尋日同青少年分享夢想與人生，佢話細路仔八、九歲嘅兒時志願都係一派胡言信唔過，一般要到十五、十六歲準備入大學決定人生路向，先算真正有夢想。不過，楊官就承認做法官從來唔係佢夢想，兒時諗過當兵、揸火車，連去美國做總統都幻想過，成長後嚟到香港巧合去做法官，做咗一兩年先覺得好有意思，嗰陣已經廿七、廿八歲，所以佢嘅夢想，嚟得特別遲。