政情：羅富昌撈過界賣奶粉
BB嘅糧食短缺問題仲未解決，巨大嘅奶粉商機極具誘惑。連有「中國罐王」稱號嘅中華廠商會第一副會長羅富昌都心郁郁，密謀撈過界賺奶粉錢。佢正同某國際知名奶粉製造商密斟，大家合作喺香港做包裝分銷，一於齊齊搵真銀。
卓妮日前見到羅罐王，佢話自己做開奶粉罐，識得唔少奶粉製造商，最近見奶粉咁短缺，於是同某大客戶傾傾嚟香港設廠，將奶粉包裝出售，進軍本地及內地市場。咁仲未夠，佢仲同內地夥伴洽商，打算喺香港成立一個研究中心，專注研究食品安全，希望帶動各界對食品安全嘅關注。
羅富昌做製罐幾十年，喺呢一行佢認第二，冇人夠膽認第一，「香港罐王」、「中國罐王」都係佢。佢間永富容器幾年前睇好東北哈爾濱嘅乳業發展，於是大力發展當地奶粉罐市場，都算係半個奶業人士。憑此優勢，佢出到聲要賺奶粉錢，大把行家呼應喇！