政情：鬍鬚曾7‧1劫數難逃
年初車公批死港府「威人威威不是威」，真係靈到你唔信。好似「史上最廢」預算案咁，就令港府陷入前所未有嘅政治危機，雖然財爺鬍鬚曾全面跪低派錢，但仍難堵悠悠眾口，亦無法冷卻沸騰嘅民憤。相隔今年七一仲有兩個月之久，但已經有部分港府高層驚到騰騰震，因為泛民議員幾乎肯定可以喺七一前提出對鬍鬚曾嘅不信任動議，加上同各類最低工資嘅爭議，睇嚟鬍鬚曾等一眾問責高官，喺七一政治大炸彈下都係劫數難逃嘞！
派錢效應消退
雖然早喺預算案二月出台時，泛民就已經計劃對鬍鬚曾提不信任動議，不過鬍鬚曾使橫手，要求建制派統統出動，圍堵提出動議辯論嘅檔期，搞到泛民今時今日都仲未成功提出動議。最終預算案以史上超低票通過，但如果鬍鬚曾以為可以偷雞過關，就未免開心得太早。立法會秘書處最新嘅文件顯示，十名議員有權優先抽籤提出動議辯論，而七月一日之前，總共有十二次動議辯論機會，意味着無論泛民成員嘅運氣如何，都肯定可以喺香港政治敏感日前夕，對鬍鬚曾提不信任動議，而鬍鬚曾亦難逃被立法會狠批、及於七一大遊行中再被叫下台嘅命運。
其實今年七一係個前所未有嘅政治大炸彈，先係預算案餘波未了，派錢雖然可以安撫到部分市民，但六千蚊最快年底先到市民手，到遊行時所有安撫效應都消退晒，相信唔少人都會「錢照攞、街照上」。其次係啱啱實行嘅最低工資，未實施前已經引發各類型嘅勞資爭拗矛盾，實施後亦肯定會推高失業率，其他負面影響亦會陸續浮現，七一就成為最適切嘅民怨爆發點，畀機會一班受影響嘅基層市民上街發聲。
有行政會議成員就分析，就係因為最低工資，今年七一分分鐘係繼○三年七一後最多人上街嘅一次，所以點樣控制民憤唔爆煲，係港府未來兩個月不能怠慢嘅工作。加上區議會選舉臨近，為咗保持聲勢，泛民成員必定會大力鼓吹市民上街，如果呢兩個月再有政府高官唔生性做錯事激嬲市民，睇怕都會拖累晒成個港府，到時就神仙難救囉。