中環出更：史立德條紋領呔獨特搶眼
前仁愛堂主席史立德（Allen）除咗係一個出色嘅馬主，原來都好識歎世界，閒時會坐遊艇出海減壓。日前卓妮喺中華廠商會嘅活動上見到佢，佢話識賺錢都要識使，所以從來不吝於享樂。當日佢穿戴一條意大利Missoni藍紫色領呔，品味獨特，非常搶眼。
Allen係廠商會常務會董，佢話近排包裝廠生意比較忙，經常要穿梭中港兩地。講起條領呔，原來係太太送嘅，佢對領呔品牌冇特別要求，只要圖案啱眼緣就得。Missoni屬於Valentino時裝集團旗下，素來以七彩顏色嘅針織及手織物料為賣點，圖案活潑，難怪吸引史太買嚟氹老公開心。
Allen講起養馬就好起勁，佢做馬主已有十年，好享受養馬、賽馬嘅過程，直言可以減壓，亦都因此領悟唔少人生嘅道理，明白天下無不勞而獲，致勝絕對唔只靠運氣咁簡單。佢將馬匹當係寵物咁疼錫，每星期都會去馬房探馬仔，餵食紅蘿蔔，難怪佢成日拉頭馬啦！