中環出更：何君堯搵發叔茶敍拉票？
屯門區議會今日選新主席，失落於呢個位嘅鄉議局主席劉皇發，尋日現身尖沙咀半島酒店歎茶，不過佢尋日嘅茶腳，竟然係坊間話一手令佢失去呢個主席位，兼且今日會競逐呢個主席位嘅屯門鄉委會主席何君堯，係咪好耐人尋味呢？
角逐屯門區會主席
呢次區會主席戰，手握十三票嘅民建聯由現任屯門區會副主席梁健文應戰，如果何君堯得到泛民主派嗰九票，連同鄉事派及其他區議員支持，場仗未必無得打。就喺呢個時候，何君堯相約發叔同埋鄉議局當然執委、前葵青區會主席何冬青，一齊喺半島歎咗成個鐘頭茶，三人全程一人一句，唔知討論咩大事。
茶後發叔話無嘢好講即閃，何君堯就話唔關選舉事，佢只係同發叔分享經驗以示尊重啫。有傳何君堯想透過發叔游說發叔兒子、屯門區議員劉業強支持，何君堯話絕無其事，但承認佢係對鄉事派有合理期望，無論如何，要拉票佢自己都會親自向劉業強拉咁話，即使請埋冬青叔到場亦唔係搵人幫口，只係大家參詳討論吓啫。
何君堯倡議修章，禁止曾任兩屆鄉委會主席人士連任，令發叔喪失參選資格，連帶屯門區議會主席嘅職位都冇埋，何君堯轉頭又嚟向發叔拉票嘅講法如果屬實，唔通政治真係瞬息萬變到咁離譜？