中環出更：李應生訪滬一日食六餐
內地客嚟香港旅遊被迫購物嘅問題時有所聞，令到本港唔少商戶擔心形象受損。由「優」嘜商戶組成嘅香港優質旅遊服務協會一於主動出擊，組團進軍內地舉行巡迴展，瞓身推廣香港品牌。參加首站上海開幕式嘅協會主席李應生（Tommy）同太子珠寶執行董事朱繼陶等人，最難忘一日食足六餐。
帶隊推廣香江
當日同行嘅團員仲有莎莎主席郭少明、孖人牌代理商昌興行政總裁余壽寧、前旅發局主席周梁淑怡、零售業立法會議員方剛等。由於佢哋只停留一日，行程十分緊密，所以密密咁食。
Tommy細數話，當日大家先飲完早茶，然後食飛機餐，抵滬後喺小南國食午飯，跟住去探訪翠華餐廳，梗係有得食。夜晚食咗餐應酬飯後，大家又去探訪太興，成日不停咁食，都咪話唔辛苦。巡迴展嚟緊星期日會喺長沙登場，中旬喺廣州站閉幕，各位團友要小心腸胃啊！