中環出更：淘至尊入伙大玩拋生菜
足不出門都能夠買通天下，事關喺呢個年代，大家都鍾意網上「淘」物，前景咁好，難怪由全國青聯常委吳傑莊（Johnny）打骰嘅淘至尊都要擴充營業，搬咗去尖沙咀嘅新辦公室。咁高興，金至尊嘅高層紛紛去撐場，大家仲齊齊切燒豬，「新金王」黃英豪仲大玩拋生菜，一於兄弟班拍住上。
新金王切燒豬：由頭好到尾
身為金至尊數碼科技行政總裁嘅吳傑莊，由佢揸莊嘅網上銷售平台「淘至尊」開咗業兩個幾月，除咗有嘢賣之外，仲同過百中外名人紅星合作開設網店，業務咁廣泛，做後防Backup嘅當然都要有番咁上下實力，所以最近Johnny將佢哋嘅基地搬咗去尖沙咀二千幾呎嘅新辦公室，早幾日舉行入伙儀式，成班金至尊好兄弟當然要去踩旺個場，仲齊齊切燒豬飲香檳，認真快活。
唔好睇Johnny讀科技出身，對於傳統入伙儀式佢都跟到足，好似切燒豬同舞獅儀式咁，一樣都不能少，Johnny爸爸同妹妹都一早嚟幫手。至於佢個好兄弟金至尊主席黃英豪亦一樣跟足傳統，同大家切燒豬嗰陣，雄聲大嗌「由頭好到尾」，當獅子嚟採青嘅時候，佢又將「生財」拋畀同事，真係好難得佢呢位日日喺金銀場作戰嘅上巿公司主席仲能夠保持一顆童心。
除咗童心之外，「新金王」原來仲好細心，話說嗰日適逢係佢哋「金至尊」尖沙咀總店嘅開幕，儀式完咗之後，佢哋成班主禮嘉賓一齊去開幕午宴，有份出席嘅旅遊發展局主席田北俊上次跌傷都仲未好番，左手手指公仲係包到成隻糉咁，搞到佢連想搣開粒喉糖都有困難，「新金王」見到即刻二話不說幫佢搣，夠晒細心。
田少話除咗搣糖之外，依家最唔方便係扣唔到右手嘅袖口鈕，所以每次換衫都要麻煩太太幫手。
卓妮