政情：最低工資 考起龔皓
最低工資尋日正式生效，真係有人歡喜有人愁。打工仔可以有更好待遇，但係作為老闆，條數就好襟計，要做到雙贏，相信都仲要磨合一段時間。依家幫緊家族旗下樓盤做物業管理嘅華懋掌舵人龔仁心細仔龔皓，都話搞最低工資一啲都唔容易，無他，因為佢哋公司本身嘅福利都唔差，依家加埋最低工資，變相成本加重咗好多，所以都唔係咁易搞，不過難搞都要搞，惟有犧牲下啲做運動同潛水嘅時間，搞掂呢個燙手山芋先。
至於佢老友「新金王」金至尊主席黃英豪就無懼最低工資，事關依家金鑽齊升，所以佢哋做零售業自然水漲船高，抽佣做人工嘅售貨員自然可以搵得更多，所以無受最低工資影響，「新金王」仲話依家內地有接近三百間舖，內地嘅員工介紹客人嚟香港消費，可以拆佣，難怪中港兩地嘅員工都可以好好緊密合作，估唔到「金王」除咗賣金，仲係「橋王」！