政情：潘佩璆上海會親家
工聯會立法會議員潘佩璆好快又飲新抱茶，潘醫生話，做律師嘅細仔經過長達六年嘅愛情長跑，終於決定同做會計師嘅上海女友拉埋天窗。潘醫生早前更趁復活節假期立法會冇會開，專誠同太太去上海見吓未來親家，未來親家好客氣，親身做嚮導帶佢哋到處觀光，兩個家庭仲分享教子女心得添，不知傾得幾投契。
潘醫生話，以前跟過立法會團去上海世博，但就冇時間喺市內遊覽，難得今次親家揸車帶佢周圍去。潘醫生話同親家好好傾，大家嘅價值觀好相近，例如雙方都好重視子女嘅教養，對埋親家就更啱key嘞。但潘醫生指唔知幾時先真正飲到新抱茶，因為香港嘅入境手續比較繁複，要未來新抱搞掂簽證問題先再擇好日子喎。
但幾時飲都好，肯定嘅係潘醫生呢杯茶可以飲兩次，因為囝囝諗住喺香港同上海都各搞一次婚禮，方便兩家親友同佢哋一齊分享喜悅喎。