政情：市建局搬樹大陣仗

熱到身水身汗嘅張震遠話，今次搬樹工程浩大，棵樹高成廿公尺，足足七層樓咁高，大樹連泥土成三百噸重，即係成架七四七飛機嘅重量，仲係本港首次使用嘅路軌移除法移樹，所以一定要嚴陣以待喎。呢棵細葉榕四十歲大，唔算係老樹，不在古樹名冊內。張震遠話棵樹形態好美，加上居民又對佢有感情，所以決定將佢留落嚟。

又係嘅，年幾兩年前有環保團體踢爆重建項目話要移走十三棵樹同斬八棵樹，但原來只要設計得巧妙啲，根本所有樹都可以留低，當時搞到都幾大件事，若果今次搬老榕樹有乜冬瓜豆腐，班街坊同環團真係唔會放過市建局呀！

發展局局長林鄭月娥

張震遠話老榕樹連泥土成架飛機咁重，搬運過程一定要小心為上。