政情：內地秘製艾未未T恤

社民連尋日又去到中聯辦示威，其中幾位成員都着住一件紅底白字、兼且印住黑色艾未未肖像嘅Ｔ恤。副主席吳文遠話，呢件艾未未Ｔ恤盛惠一舊水，暫時印咗一百件，而為咗降低成本，佢哋一如以往喺內地印製，不過平極成本都要七十蚊件，唔算平，因為要喺香港加工。吳文遠解釋，原本成本就唔使七十蚊咁貴嘅，不過最慘即使係一直合作開嘅內地廠商，亦唔敢印啲寫住「茉莉花革命」字樣嘅製品，最多只可以側側膊印上艾未未嘅肖像，搞到佢哋要拎晒啲Ｔ恤返香港加工印上聲援艾未未同茉莉花革命等字句，結果令成本大漲。

先印一百件 研究網上訂Tee

社民連今次少少地印咗一百件Ｔ恤，暫時只會放喺街站同總部畀人買，不過據聞反應相當唔錯，短短幾日已經就快售罄。吳文遠話，佢哋以前都印過唔少有政治涵意嘅Ｔ恤，不過尺碼唔多，身材比較魁梧嘅都未必啱着，就連黨內幾名「行動組」成員都着唔落，認真慘情。佢哋今次就學精咗喇，整多幾件加大碼，咁就身形大啲都可以着啦！

社民連正研究緊可唔可以做到網上訂購Ｔ恤，好多市民已經畀艾未未感動到，相信當中唔少都會買番件支持吓。不過依家件艾未未Ｔ恤曝光，內地廠家仲肯唔肯幫佢哋生產呀？

吳文遠好無奈咁話，即使係咁都冇辦法，初步估計如果成個生產過程都喺香港進行，成本一定升到過百蚊件，到時即使反應良好都未必有機會再出，呢件隨時係絕版貨。其實艾未未同茉莉花革命嘅消息喺內地被全面封殺，有內地廠商竟然成功製作聲援艾未未嘅Ｔ恤，社民連就已經係好大成就喇，最終賣出幾多件，可能都係次要喇。