中環出更：食力簡嫌雪茄新不如舊
捲入鄉選賄選案嘅冠軍練馬師簡炳墀，心情似乎未受影響，尋日擔住大雪茄現身馬場，表現一樣咁風騷。簡Sir大爆歎雪茄逾五十年，一嗒便知龍與鳳，佢發現雪茄煙絲愈來愈「嫩」，唔夠「陳年」，香味大不如前。
擔住大雪茄已成為食力簡嘅招牌標記。簡Sir尋日喺馬場點起雪茄細訴當年情，原來佢喺五十年代已迷上呢種玩意，可惜當年收入唔多，直至當上練馬師，食雪茄至可以真正成為嗜好。
簡Sir話佢後生時，每日吸好多支，最愛古巴出品，貪佢煙味濃醇芳香。現在年紀大咗，每日只食一至二支，點到即止。佢仲買埋防潮箱珍藏心愛雪茄，稱得上係半個專家。
時移世易，雪茄口味款式推陳出新，但簡Sir發現，新不如舊好。佢慨嘆部分商人急於將雪茄推出市場，太嫩嘅煙絲亦被採用，失卻原來香醇味。佢曾向煙草商反映不滿，但最終都冇用喎。