中環出更：楊釗家族揼水助內地防愛滋
「善心」係有家族遺傳架！向來鍾意做善事嘅「牛仔褲大王」楊釗，原來成個家族都有呢個遺傳因子，七年內共捐近四千萬元予「中國愛滋病防治行動香港委員會」。能夠促成呢件美事，除咗要多得「金刀梁」梁智鴻醫生、愛滋病專家何大一醫生及媽打李麗娟外，仲因為《太陽報》嘅報道，先至可以讓遠在美國嘅楊釗哥哥楊洪認識呢個組織，因而落力捐錢幫助內地愛滋病防治工作。
睇《太陽報》得悉組織成立
○四年成立嘅中國愛滋病防治行動香港委員會，七年來共籌得七千八百萬元，當中有一半係來自楊釗呢個善心家族。話說○四年《太陽報》報道咗香港委員會成立嘅事，當時遠在美國嘅楊釗哥哥楊洪睇到篇報道，覺得好有意義，馬上聯絡咗呢個會嘅聯席主席何大一，表示想幫手出一分力。七年以來，楊氏家族除咗現金資助之外，仲身體力行去支持添。
楊洪囝囝楊駿業（David）、兩位聯席主席何大一及梁智鴻，仲有副主席李麗娟，尋日一齊出席記者會。○五年開始出任香港愛滋病基金會董事嘅David，○三年回流香港，佢話因為爸爸經常要周圍飛，所以佢代父出力，到內地愛滋病嘅重災山區探訪，身邊嘅商界朋友見佢咁熱心，都紛紛出錢又出力，同David夫婦一齊返去探望病患者。
David話，愛滋病唔止係病咁簡單，仲係一個社會問題，因為患者仲有活動能力，仲需要工作，但社會存在歧視，令到佢哋唔可以融入正常生活，加上要負擔醫療開支，所以好需要幫助。David仲話，內地有好多赤腳醫生自發去偏遠山區義診，但每次腳程來回要用五至六小時，所以佢哋楊家嘅「慈輝佛教基金會」亦都捐咗一批電單車畀佢哋，等佢哋揸住兩個輪去救人更有效率。
順道一提，嚟緊六月佢哋會舉行慈善首映，邊齣戲？咪就係由郭富城同章子怡主演、探討愛滋病話題嘅《最愛》囉。
卓妮