中環耳目：陳淑莊推介鬥牛國餐廳
立法會議員陳淑莊（Tanya）係為食之人，嗜好之一就係搜羅正斗食肆，推介畀身邊老友分甘同味。經常出入中環嘅Tanya最近向卓妮介紹一間叫做FoFo嘅西班牙餐廳，佢話呢間餐廳嘅食物水準不俗，不過對佢嚟講仲有一個小問題，令卓妮好奇點解有問題仲推介畀大家呢？
好食惜分量略少
FoFo位於中環威靈頓街一幢商廈嘅二十樓，午市菜單提供前菜、主菜同甜品，任擇兩道菜盛惠一百六十八蚊、三款則要一百八十八蚊。胃口唔細嘅Tanya喺點菜前向卓妮揭開謎底，佢話FoFo啲嘢無錯係好好食，只可惜份量略少。
Tanya揀咗忌廉湯做前菜，主菜就係煎羊柳配以燒茄子、甜椒同蕃茄，唔使半個鐘，Tanya就清晒湯同主菜，甜品開心果雪糕都畀佢「清盤」。埋單嘅時候，餐廳職員問Tanya啲嘢夠唔夠食。其實啲食物咁好味，唔夠食，咪再叫囉。