政情：陳維安施政無瓣掂
教育局副局長陳維安上任教育局近三年，電子書、教科書統統未搞掂，縮班問題就加鑊泡，都唔知幾時至搞得掂，佢嘅唯一成績，可能要喺內地四川先見到。香港啲學生同家長，心裏唔知點諗呢？
四川大地震發生至今快三年，陳維安尋日透過教育局網頁專欄「局中人語」，抒發過去兩年多探訪四川災區的感受，特別提到○八年九月曾經到四川映秀鎮一公路，身處公路的地面相比以前足足下降咗三十公尺，大約十層樓咁高，然後又有山泥傾瀉，新土掩蓋舊土，副局長都特別唏噓，嘆句「到底在那三十公尺下的舊土裏埋了多少人和事，我不得而知。」
抽水談川校重建
雖然香港教育問題瓣瓣都唔掂，但佢竟話今年係教育局在四川重建上的收成年，因為唔少重建項目好快可以完成，咁都講得出口，唔知有冇諗到香港學生同家長嘅感受呢？