拓荒者靠萊爾大逆轉
拓荒者大逆轉反勝小牛！昨日季後賽拓荒者喺最多落後23分嘅劣勢下，最終主場反勝小牛84比82，7場4勝制總比數扳成2比2平手，小牛班主古班喺場邊睇到眼火爆，忍唔住場波未完就走人，睇嚟小牛聽朝返主場打Game5，要大打爭氣波氹番老細至得！（now 678周二早上8時30分直播）
一如所料，拓荒者對小牛係季後賽西岸首圈爭持最激烈對碰，兩隊都成功保住自己嘅主場優勢進入Game5，其實又唔怪得古班咁躁，因為小牛今仗輸波可謂咎由自取，佢哋喺第三節剩番1分16秒時，本來遙遙領先67比44，點知喺第四節發波瘟，畀拓荒者後衞萊爾如入無人之境，單係第四節已攞咗18分。
上陣25分鐘轟入24分
萊爾今場後備上陣，打咗僅25分鐘，就攞咗24分、4個籃板球及5次助攻漂亮數據，並成為今場得分最高球員。萊爾賽後話呢場波一生難忘：「我會永遠記住呢場波，曾經有好多次，我懷疑自己能否再打籃球，但今仗發生嘅一切，我都會永遠記得。」
萊爾咁感觸係有原因，因為佢近年長期受傷患困擾，自06年開始膝蓋已經傷痕纍纍，09年更要施手術切除半月板，加上佢自小已經患上閱讀障礙症，由細到大嘅身世都咁坎坷，難怪佢今場帶領拓荒者反勝咁激動。
二連敗嘅小牛，惟有希望返回主場可再次贏波取得領先。小牛主將魯域斯基表示：「輸波已成事實，我哋惟有將失敗拋諸腦後，好好準備第五場賽事。」
戰果放送
金塊 94:97 雷霆
灰熊 91:88 馬刺
拓荒者 84:82 小牛
溜馬 89:84 公牛
註：前者主場
本報綜合報道