中環出更：蔡氏姊弟瑞士公幹捱熱狗
玩具大王蔡志明早前將喜運佳錶行收歸旗下，佢嘅仔女都要為做好間錶行而努力，早前蔡加怡同蔡加讚首次結伴去咗全球最大嘅錶展——瑞士巴塞爾鐘錶展（Basel World）開眼界，兩姊弟忙到要食熱狗充飢，但都話非常值得。
作為八十後嘅富二代，卓妮先排撞到蔡加讚同家姐蔡加怡一齊喺中環喜運佳錶行巡舖，嗰時仲講緊要去瑞士巴塞爾鐘錶展朝聖，轉頭兩姊弟都睇完返嚟，加讚仲直言滿載而歸。佢話兩姊弟首次去錶展，睇到唔捨得走，每日踩足十幾個鐘。日頭巡場，晚上見客，撞啱忙得滯，坐埋一邊食隻熱狗又一餐，都唔好話唔辛苦。
寓工作於娛樂
蔡家生意範疇廣泛，手錶同汽車都係家讚最愛嘅「玩具」，依家佢前舖賣名錶、汽車，後廠做玩具，三樣都開正佢興趣，所以做起上嚟更起勁。再者零售業千變萬化，直接處理客人要求，又要搵靚舖位，同做廠要攞定單做QC好唔同，難怪佢話工作一啲都唔悶，因為有好多新鮮事可以學習。
同時間睇住三門生意，加讚話要分身都唔難，因為玩具廠準備進入旺季，佢哋人手充足，加上有同事睇住，所以唔使日日返深圳廠房，可以留喺香港嘅總司令台，以一星期計，手錶同玩具各佔佢兩日時間，不過遇上玩具廠有大單要傾，就要喺錶嗰邊抽半日過去。手錶方面，加讚希望可以打入內地巿場，嚟緊佢哋喺廈門會開一個大商場，亦會喺一二線城巿搵番個舖位，當然亦會進軍澳門。至於汽車零售就有堂哥加頌打點，不過佢坦言以前抱住「兼職」態度嚟做呢門生意，依家就會睇番多啲，可以講係愈做愈認真。
卓妮