中環耳目:陳幼南推介新派潮菜

陳幼南上任潮州商會會長後,帶領商會走得更「潮」。他愛吃「潮菜」,食遍潮汕各處,正斗潮州手打牛丸、潮州白粥、滷水鵝頭,統統琅琅上口,如數家珍。近日佢將「潮食」心得引入商會,推出多款新派潮菜。

陳會長尋日就喺商會會員俱樂部筵開三席,請老友試菜。先嚟一味「護國菜海鮮羹」,個羹剛好分成綠、白兩邊,畫出一個太極圖案,別出心裁。傳統「護國菜」係以番薯葉煮成羹,相傳係由逃難到潮州嘅宋帝昺命名,陳會長將佢改良,加入海鮮,入口更惹味。再嚟係「豆醬焗蝦」,潮州普寧豆醬係以黃豆、麵粉及食鹽發酵而成,味道鹹中帶鮮,以豆醬煮焗雞,係傳統潮菜,陳會長就提議以蝦代雞,用普寧豆醬焗製,令蝦味更濃郁。

商會慶祝90周年

食得招積,皆因潮菜從小陪伴陳會長成長,至愛一味「家鄉老鵝」。佢話,每隻老鵝重達二、三十斤重,鵝味濃醇無比,尤其愛吃鵝頭。咪睇小鵝頭唔值錢,家鄉每個鵝頭賣八百元,比鵝片還要矜貴。

品嘗美食只係前菜,商會為慶祝九十周年,嚟緊節目多多。商會會董陳德寧牽頭舉辦「人間有情」攝影比賽,唔係「家己冷」都可以參加,題材圍繞親情、友情、愛情或者鄉情都得,冠軍獎金有一萬元。

卓妮

Money18免費即秒股票報價網站現推出8升級功能,財經資訊,實時實發!