中環出更：李家傑勉青年大膽創業
喜獲三胞胎嘅恒基主席李兆基大公子李家傑（Peter），有子萬事足，做咗爸爸後應酬都減少，消閒娛樂就係湊仔。Peter直言好享受做湊仔公生活。湊BB令佢心態愈來愈後生，無論八十後、九十後嘅未來，佢都好關心。Peter尋日以創會主席身份出席百仁基金盆菜宴，勉勵年輕人要敢於夢想，大膽創業，成功絕對唔係奢望。
細妹買海鹽贈家人
匯聚富豪二代嘅「百仁基金」，尋日喺元朗八鄉舉行別開生面嘅生態文化之旅，招待二百五十多位來自低收入家庭年輕人，遊八鄉兼食盆菜，體驗圍村文化。Peter放下三個ＢＢ，穿起波鞋、牛仔褲到場，顯得朝氣勃勃，佢話三胞胎健康又活潑，一句講晒，就係Happy。
咪以為Peter掛住湊仔就不問世事，好似早前搶鹽荒，佢都好驚訝。Peter笑言，佢細妹似乎未卜先知，坊間未搶購食鹽，細妹已快人一步買定幾包健康海鹽送畀家人，爸爸李兆基都有一包，但佢強調，妹妹唔係盲目跟風，而係咁啱得咁蹺喎。
日本核災難令各人都表示關注。家族經營玩具生意嘅林智彬，地震後如常交貨去日本，但運輸網絡一度出現小混亂，好彩近日已回復正常，六月中仲會飛去東京傾生意添。投資物業了得嘅廖偉麟就話考慮低吸東京市中心一帶嘅優質商舖，已故富商張祝珊後人許明明就關注日本化妝品會否受輻射污染，唔想白滑肌膚受影響喎。
施榮忻倡北上掘金
「百仁」兄弟姊妹一向齊心，除百仁基金主席施榮忻（Jaime）外，多位富二代成員都有撐場，包括副主席林智彬、全國政協常委楊孫西兒子楊華勇及湯珈鋮，委員方面就有莊家蕙、金城營造主席王國強兒子王紹基、許明明及廖偉麟等。佢哋同年輕人打成一片，邊食盆菜邊分享成功秘訣。Jaime更自掏腰包送出二百多本《中國全方位透視叢書》，鼓勵年輕人多認識中國，北上發展，闖出一片新天地。
卓妮