中環出更：王英偉睇台片別有趣味
台灣電影向來有批香港擁躉，尋日台灣駐港機構中華旅行社及光華新聞文化中心舉辦一場台灣影視交流酒會，「公職王」王英偉（Wilfred）以香港國際電影節協會主席身份現身撐場。佢話即使冇獲主辦單位邀請，佢都要嚟趁熱鬧，事關佢係台產片擁躉，全程聽閩南話對白完全冇問題喎！
懂閩南對白多笑位
Wilfred講起台產片如數家珍，由幾年前叫好又叫座嘅《海角七號》，到近期嘅猛片《艋舺》，佢都睇過晒。佢話同屋企人睇《海角七號》時，由於聽得晒原汁原味嘅閩南話對白，所以佢嘅笑位零舍多過人，點解咁犀利？皆因佢係福建人囉！不過，佢笑稱自己喺香港出世，所以識聽唔識講。
光華新聞文化中心主任羅智成同Wilfred一見如故，兩人講起電影及藝術眉飛色舞。百足咁多爪嘅羅智成原來監製過紀錄片《街舞狂潮》，仲獲得去年金馬獎最佳紀錄片獎項添！佢話未來夢想係製作一部商業電影，至於電影題材就暫時保密先喎！Wilfred同羅智成仲約定搵機會一齊搞活動，大家要拭目以待喇！