起搏器換電貧病翁求援
生命誠可貴，無論富貴貧賤老弱，皆有爭取尊嚴生活的權利！今年七十四歲的李成裔在二十年前證實患有柏金遜症，礙於藥物帶來嚴重副作用，四肢愈來愈不受控，日常生活大受影響，最後獲醫生建議安裝起搏器 （腦深層電刺激術）後，情況才獲改善。可惜起搏器使用多年後，電力近日幾已耗盡，李伯因無力籌措約十一萬以更換電池，四肢失控情況再現，亟待東方日報慈善基金善長伸出援手。
「手術要全身麻醉，醫生話如果等到冇晒電先嚟換就好危險！」李太一臉擔心地說。李氏夫婦自女兒成家後便二人一直相依為命，「後生嗰時我做工人、佢做技工，咁多年嚟都係自力更生，但今次真係諗唔到辦法！」李太憶述，年輕時的李伯身體壯健，「公一份婆一份」胼手胝足地供養獨生女成人，直至李伯得病才相繼退休。
「電視機啲人打交 佢就打自己」
患病初期，李伯一直以藥物控制病情，但「愈食愈多藥」後病情卻每況愈下，更產生嚴重副作用，「電視機啲人打交，佢就打自己；坐坐吓又會好似個公仔咁唔郁得，要叫白車送入急症室。」
日常生活受到嚴重影響，李伯終在醫生建議下安裝起搏器，「拎晒啲棺材本都唔夠畀，要阿女幫一大截。」
未料儀器轉眼間又告「冇電」，「阿女依家有頭家幫唔到手，我一扎醒就會放隻手埋佢個鼻，睇吓佢有冇事！」
伊利沙伯醫院發言人稱，李伯於九一年確診，及後出現嚴重運動併發症及手舞足蹈、僵直等不自主動作。增加服用藥物頻率後情況仍未改善，更產生幻覺等副作用，影響生活及生命質素。接受手術後病況改善，但當起搏器停電失效時，病情會急速惡化。
「醫生話裝個用得耐啲嘅，唔使隔幾年再開刀，增加風險，可惜平、貴我哋都唔夠錢！」李太嘆道。醫生指可使用約四年的起搏器費用約需十一萬三千多元，至於可充電及使用約九年者則約需二十萬元。
捐款編號：12067