中環出更：陳仲尼打鴨仔呔 童心未泯
政商界男士衣着變化空間不大，所以胸前嘅細小領呔就成為全套西裝嘅靈魂所在，亦可洩露主人嘅心情。好似做金融生意嘅香港青年聯會主席陳仲尼（Rock），日日掛住做好青年工作，又要
實全球市場嘅波動，時刻不能放鬆，所以佢鍾意顏色活潑鮮艷嘅領呔，早前佢就戴咗條滿布黃色鴨仔圖案嘅Hermes靚呔，感覺夠晒喜慶。
愛柔黃色夠喜慶
近排阿Rock同成班青聯兄弟姊妹忙出忙入，全情投入明天喺柴灣廣場舉行嘅青聯招工活動，服務熱誠冇得彈。卓妮見阿Rock戴咗條Hermes靚呔，襯到個人好醒神，佢話鍾意條呔柔黃色有喜慶感覺，上邊又有數唔晒嘅鴨仔，充滿童趣。咁有眼光，唔通係太太區海倫幫佢買嘅？阿Rock一講起老婆就成個人輕鬆晒，但笑稱條呔只係自己買，因為太太掛住自己裝身喎！
卓妮記得經濟動力立法會議員林健鋒都係Hermes擁躉，佢曾經戴咗條設計有異曲同工之妙嘅Hermes粉紅色領呔，上邊滿布細小行李篋及雀鳥。大男人嘅童心，Hermes真係瞭若指掌。