中環出更：羅建生為興趣 900萬買良駒
做生意，考眼光亦都講運氣，做馬主亦然，眼光同運氣都係贏馬關鍵元素，今屆會有第三匹馬入選打吡大賽嘅松齡投資有限公司董事總經理羅建生，樓房同股票嘅投資都有，不過買馬佢就視為娛樂，九百萬元買一匹「喜競寶寶」，佢寄望甚殷。
由八七年開始養馬嘅羅建生，咁多年嚟總共養咗十四匹馬，連埋「喜競寶寶」，已經係第三次入選打吡大賽，眼光同運氣都不容置疑。八七年羅生用卅幾萬元買咗佢第一匹馬「聚寶」，兩次頭馬加埋位置獎金，令「聚寶」有能力買糧草不求人。之後羅生嘅「喜聚寶」同「喜威寶」，分別入選○八同○九年嘅打吡大賽，仲有係贏過○二、○三年季度最佳短途馬「喜勁寶」，係短途三冠，仲順利做埋馬王，成績斐然。至於出戰今屆打吡嘅「喜競寶寶」，之前已跑過英國同愛爾蘭嘅打吡，嚟香港出戰嘅幾場比賽中，亦愈來愈進步，羅生笑笑口話如果「喜競寶寶」做馬王，就有配種價值，咁到時羅生咪升呢做馬爺爺囉﹗
最愛投資房地產
依家正在興建山頂歌賦山道一號超級豪宅嘅羅生，坦言賺到錢嘅房地產係佢最開心嘅生意項目，股票揀得啱的話，穩穩陣陣有息收亦唔錯。至於賽馬，就有娛樂的滿足感，但就係回報最低嘅投資。