中環出更：嬌小龐愛蘭拉郁飛機
身兼藥劑師嘅沙田區議員龐愛蘭（Scarlett）身材嬌小玲瓏，但佢竟然夠膽參加尋日民航處舉辦嘅「拉飛機活動」，同七十幾個航空界人士及城中名人，一齊拉動一架重一百三十公噸嘅香港航空330空中巴士。Scarlett笑稱事前一次都無練習過，只係起床後練咗十五分鐘柔軟體操，但過程好順利，心情興奮，就算畀冰凍海風吹住都冇有怕喎！
尋日同Scarlett一齊拉飛機嘅隊友，仲有香港菁英會主席白富鴻、常務副主席洪為民等，個個男人都身材健碩，唔怪得Scarlett唔使事前練習都拉得郁架飛機喇！
講起飛機，Scarlett都有唔少有關飛機嘅趣聞。佢記得兩、三年前去新西蘭揸滑翔機，架機飛到三千幾呎高空時，放喺褲袋嘅手提電話突然響起，當時都唔知聽唔聽好，佢話：「對手揸實架機，根本無手聽，我用香港電訊商嘅漫遊服務，好驚嘆原來電訊服務咁犀利，高到三千幾呎都覆蓋到！」