中環出更：名媛靚太拒跟風搶鹽

尋日港九新界都出現搶鹽、搶米人龍，卓妮身處中環就天下太平，咁啱經過太子大廈遇到王守業夫人，佢聽見有人搶鹽都大惑不解，都唔知點解咁多人認為食鹽可以抗輻射，佢希望大家唔好再誤信呢啲謠傳。王太依家只係擔心日本災情，事關好多長者同小朋友無藥食，加上天氣又凍，所以佢諗緊點樣幫班災民。

拉姑順勢戒鹽

卓妮行行吓又撞到拉姑狄波拉喺置地廣場Cafe Landmark歎完下午茶，佢都話唔知點解咁多人搶購食鹽，平時佢喺屋企煮飯都好少落鹽，因為食得太鹹對身體唔好，既然咁多人搶鹽，可以順勢戒埋食鹽，對家人健康仲好。同樣都係一家之煮嘅公開大學校長梁智仁太太許安璞，同前仁愛堂主席龐維新太太董晶怡都一樣唔信謠傳。

雖然龐太向來買開新西蘭海鹽，但佢唔信會食鹽短缺，亦唔信食鹽可以抗輻射嘅傳聞。不過，龐太話呢幾日去買餸，見到好多人搶購日本貨品，好似佢想買綠茶，未伸手攞已被另一客人將貨架上十幾包綠茶全部掃光，相當誇張。不過，龐太平時都會用海鹽浸腳，去腳部水腫。

傍晚時分，卓妮又去咗灣仔會展嘅婦女節酒會，見到一眾靚太，亦無搶購食鹽打算。立法會秘書長吳文華話無咁嘅需要，但會密切留意事態發展。候任香港女童軍總監彭徐美雲就崇尚低鹽飲食，唔使買咁多鹽；至於即將離任總監嘅邊陳之娟及佢嘅醫生囡囡毓雯都有討論過呢個問題，但佢好清楚吸收過多嘅鹽對身體無益，如果有高血壓就更大影響喎。至於機管局行政總裁許漢忠太太Eva，早上已聽到有人喺網上散播謠言，佢希望大家可以理智啲，唔好亂咁散播謠言，亦唔好誤信流言蜚語，加上佢食得清淡，所以都唔擔心無鹽。

董晶怡鍾意用海鹽浸腳，有去腳部水腫功效。 （資料圖片）	拉姑：「啲人搶購食鹽仲好，我同家人索性戒埋佢！」	邊陳之娟（右）同做醫生嘅囡囡毓雯（中）都話食得太多鹽對身體無益。 （溫國佳攝）