不齒抬價 善長街頭贈鹽
【本報訊】「有錢咪幫吓人囉！唔通留番嚟醫病咩？」無良奸商瘋狂抬價，反有善長眼見長者窮人被迫食貴鹽，自發購買三百公斤粗鹽免費分發予數百名街坊，街坊無不豎起大拇指大為讚好，有長者更大嘆在港卅年來首次見到有人「咁有善心」，但該善長卻淡然說：「做善事不留名，施恩莫望報。」幾經追問才僅透露自己姓陳。
怕長者貧戶無力負擔
全港食鹽均被抬價，戴上眼鏡街坊樣子的陳先生，昨日中午憂心公公婆婆無鹽落肚，「自摷荷包」以每袋鹽一千元搜羅購入鄰近街市商戶六大袋粗鹽，在馬鞍山恒安邨街市免費派發，每人約獲發一斤鹽。原本憂心忡忡買不到鹽的街坊互相通傳前往領取，人龍最長時估計有六七十人。附近菜檔、雞檔檔主及街坊眼見陳先生一人手忙腳亂，紛紛上前協助。
「佢啊！真喺大善長嚟架，成日見到阿婆執紙皮，都會畀零用錢佢哋。」雞檔姓李檔主見到陳先生不欲多談自己的善舉，不禁代他回應。對被稱頌，該名姓陳善長僅輕輕地說：「都係驚今日冇鹽啫，過咗今日，傳言冇咗就冇事㗎啦。」「其實我以前做海關嘅，有啲餘錢，又冇太大家庭負擔，咪幫吓人，唔通好似曾蔭權咁咩？做衰晒我哋嘅形象！」