政情：朱繼陶大談錶商血淚史
前人種樹，後人乘涼，香港鐘錶業發展蓬勃，都係多得業界幾十年來嘅努力，捱過唔少鹹苦。每年一度嘅鐘錶界盛事「瑞士Basel World巴塞爾錶展」快將舉行，有份出席嘅太子珠寶鐘錶執董朱繼陶話，有鐘錶界老前輩講過，當年過去瑞士搵買家，要自行租貨Van喺會場門口擺檔，期間仲被人驅趕，真係聽見都覺得世界難撈。
擔心日本經濟波動
不過，朱繼陶話港人轉數高，又識執生，最叻逆境自強，經過三十幾年嘅努力，時至今日已經再無被人驅趕離場呢支歌仔，錶商到當地擺攤位展覽方便得多，加上貿發局到當地搞香港館協助港商，令香港鐘錶業發展得以蓬勃。
生意好做咗，生活自然好，經常同仔女去日本旅遊嘅朱繼陶話，最愛吃仙台嘅燒牛脷，但眼見日本大地震引發海嘯嘅災難場面，佢都感到好難過，同時亦擔心日本經濟波動會影響亞洲地區，至於影響程度會有幾大，就要睇下救災嘅速度喎。