政情：長洲80後狙擊邱騰華
環境局局長邱騰華做唔到源頭減廢，建議喺石鼓洲起焚化爐燒垃圾，又惹來環保團體同長洲居民群起反對，擔心造成污染。尋日佢上電台同年輕人對話時，就畀一名長洲八十後狙擊，搞到佢灰頭土臉，認真無癮。邱騰華過往推動多項環保政策都衰收尾，唔知今次會唔會又重蹈覆轍呢？
邱騰華尋日出席一個電台節目，諗住透過同班八十後對話硬銷港府嘅垃圾環保政策，點知啲後生仔仲牙尖嘴利過班立法會政壇老手。
其中一名本身住長洲嘅八十後，就連珠炮發咗十幾分鐘，力數喺石鼓洲起焚化爐嘅種種壞處，又批評政府份環評報告雖然對重金屬有規定，但就對重金屬嘅累積隻字不提，指芬蘭焚化爐附近居民嘅頭髮水銀含量超晒標，質問邱騰華點解決。
耍官腔答焚化爐質詢
面對質素咁高、內容同理據都咁充足嘅質詢，邱騰華一方面大讚對方理性同講道理，但另一方面又繼續耍官腔。睇嚟要對付言不及義、答咗等於冇答嘅高官，理性同講道理都係冇用嘅，不如學其他八十後透過抗爭行動狙擊高官好過！