政情：書商反擊 陳維安面燶
教育局副局長陳維安日前單方面宣稱，已就課本與教材分拆問題，同兩大出版商達成四點共識，旋即引來書商反擊，話雙方根本未達成共識，有書商更踢爆當局喺雙方會面嘅會議記錄「做手腳」，「扣起」業界提出嘅部分意見，企圖以「大石砸死蟹」方式迫令書商妥協，喺今年落實方案。
面對連串嚴重指控，陳維安尋日竟選擇逃避傳媒採訪，最後畀記者逼埋牆角，不得不作回應，佢就黑面拋低一句「冇補充」，然後立即快閃上車走人。
記者圍攻狂質問
陳維安尋日出席一項公開活動時，多番迴避記者追訪，但記者仍然冇放棄，決定集體守候喺佢架車旁邊等佢離開。問及局方聲稱同書商達成共識係咪「講大話」、局方係咪曾經修訂會議記錄等，陳維安一概耍官腔答非所問，只重申會如期喺今年九月落實分拆教材，要求書商喺下月上載分拆後嘅價目至當局網頁等，希望減低課本價格云云。
記者當然冇咁易畀佢耍走，繼續質問佢有關問題，陳維安最後面燶燶咁話：「我哋對於呢幾日書商講嘅嘢已經作出回應，我哋冇補充。」然後立即轉身快閃上車走人。教育局局長孫明揚日前先因為殺校問題，畀人質疑佢講大話要佢落台，估唔到啲黑氣咁快就傳到佢副手身上。不過相對於孫公嘅處變不驚，大方回應，陳維安表現就閃縮好多，令人覺得理虧嘅係佢自己。