政情：公民力量拒抬轎 陳克勤頭痕
下屆立法會新界東選區估計將由七席加至九席，隨時攞唔夠三萬票都可以當選，比新界西更加容易「博大霧」，因而吸引到各方人士加入競逐，包括一啲過往唔夠票自己插旗出選、只能喺背後幫人抬轎嘅政團。除咗早已表明會轉戰新東嘅工聯會勞工界議員葉偉明之外，據聞一直支持開民建聯嘅公民力量，亦有意打正旗號喺新東獨立參選，仲講到明唔計輸贏添！如果真係落實，影響最大嘅就係民建聯陳克勤。
公民力量喺九三年由現任民建聯副主席劉江華成立，扎根沙田區足足十八年，依家喺沙田區議會佔有十五席，地區實力雄厚，情況同民協喺深水埗相似。但每次去到立法會選舉，佢哋就只能為她人作嫁衣裳，喺背後默默支持由劉江華領軍嘅民建聯新東團隊，上屆仲成功令同公民力量毫無關係嘅新丁陳克勤當選，令佢哋及其支持者滿不是味兒，覺得做得二奶耐，點都想做吓大婆。
事實上，上屆泛民主派喺新東連取五席，主因係建制派自己協調同配票失敗，自由黨田北俊同新論壇龐愛蘭互相搶票兩敗俱傷唔在講，民建聯選擇以一條飛強勢出選，結果亦嘥咗唔少票，令建制派只攞得兩席。如果今屆配票得宜，新增兩席全部落入建制派手中亦唔係冇可能，故此令唔少建制派人士蠢蠢欲動。
建制派未協調 七國咁亂
地區消息透露，公民力量一批核心成員近排不時坐埋密斟，計劃學過往亦係支持開民建聯嘅工聯會一樣，喺新東撻自己個朵出嚟參選，唔再幫人抬轎。當然啦，參選得就冇話贏硬，不過公民力量內部評估，即使選輸都冇大問題，因為至少已經做到增加知名度呢一點，認為呢一着有贏冇輸。
當然，公民力量嘅如意算盤打唔打得響，依家仲係未知之數，皆因除咗劉江華同陳克勤肯定會爭取連任之外，自由黨同龐愛蘭估計都會再次出戰，再加上葉偉明、最近埋咗鄉事派堆嘅前自由黨成員方國珊、甚至有傳民建聯想再爭多席，淨係建制派內部都打到七彩，最後隨時要由西環居中協調，先知公民力量能否出選！