中環出更：女童軍總監退位續行善
早前被揭發超齡參選嘅香港女童軍總會總監邊陳之娟，任期只剩下一個多月，班女童軍高層早幾日就喺金鐘港麗酒店搞咗個午餐聚會，掛名叫聯誼，但當然係為邊太餞行啦。據聞聚會係由副會長梁王培芳統籌，唔少副會長同名譽副會長都有出席，但當選無耐嘅候任總監彭徐美雲，就因為身體不適而缺席，一度令人產生無限聯想。
午餐聚會為邊太餞行
當日有份出席聚會嘅高層，包括副會長大新銀行主席王守業夫人王嚴君琴及積金局行政總監陳唐芷菁，就連前副會長、教育局局長孫明揚太太孫鍾小芬都出席湊熱鬧。邊太離任在即，但佢似乎冇打算停下來，佢之前同卓妮講過，即使唔做女童軍總監，仍然會繼續獻身義務及慈善工作，更加唔會畀之前種種負面消息打擊到喎！
雖然邊太無講清楚之前發生乜嘢負面消息，但卓妮就發現聚會缺少咗候任總監彭徐美雲，即時令人產生無限聯想。不過，消息人士透露，彭太當日只係因為身體不適而缺席，並無其他原因。講開彭太，最近傳佢有意做港區婦聯代表聯誼會會長一職，但彭太早前同卓妮講，佢暫時冇考慮到呢個問題，現階段只會盡心服務社會喎。