政情:楊哲安fb抽水慘被圍攻

教育局政治助理楊哲安(Jeremy)活躍於facebook,早前因留言講錯嘢,被網民圍剿。不過,Jeremy並冇經一事、長一智,反而喺立法會否決臨時撥款議案一事鬧得熱烘烘之際,竟然留言話:「政治目的重要,還是市民利益重要?」擔心否決撥款會影響近百億元教育開支。說話背後抽水味濃,貼出短短九小時已有逾八十名網民狠狠回應。

有網民質疑,政府交唔到份令人滿意嘅預算案,議員代市民講句「唔收貨」絕對合理,港府唔應該將責任推卸畀人;亦有人話議會作用係監察港府施政,如今議案被否決,港府應該檢討,而非埋怨,總之狂插Jeremy,但撐佢嘅人寥寥可數。

面對指摘,Jeremy冇坐以待斃,更反駁網民指摘港府冇提醒建制派投票嘅言論,佢話任何公司都唔會每日打電話叫員工返工喎!莫非佢想寸建制派辦事不力?雖然Jeremy今次同政府一樣錯估形勢,結果遭網民圍攻,但肯同市民溝通已算係咁嘞。

Money18新功能「18好路數」為你預測心水股票升跌機會率