中環出更：鄧肇殷變仁濟奶粉救星
全城陷入奶粉荒，但一班初為人父母嘅仁濟醫院總理就好淡定，皆因總理中有個卓悅美容集團高層鄧肇殷（Erica），由於卓悅有賣奶粉，所以Erica成為仁濟奶粉救星。
何芷韻寫卡致謝
育有一對仲未夠一歲龍鳳胎嘅仁濟副主席李文斌（Edmond）話，佢都係多得Erica幫手，先至長期有穩定嘅日本奶粉供應，而且仲提供埋貼身尿片，完全照顧到龍鳳胎嘅需要，難怪佢太太何芷韻（Amanda）都話要代表BB寫張卡多謝Erica嘞！
日前仁濟醫院舉行周年籌款晚宴，梳咗個靚靚髮型嘅Amanda同打扮入時嘅Erica，好似孖公仔現身撐場，佢哋除咗BB嘅糧食話題外，其他嘢都好啱傾，就連御用髮型師都係同一人，當日兩人就係Set完頭後一齊到場。
Amanda話，佢同Erica呢段姊妹情緣源於仁濟；而Erica就話，因為佢同Amanda年紀相若，又一齊做善事，所以零舍投契喎。Edmond將於四月坐正仁濟主席，Erica梗要瞓身支持啦！