中環出更：扮嘢文有諗頭網上賣酒
賣花姑娘插竹葉，做酒吧餐飲生意嘅蘭桂坊之父盛智文（扮嘢文）竟然滴酒不沾。不過，扮嘢文將蘭桂坊由香港打入內地，最近仲將酒舖開到上網，為酒客搜羅世界各地嘅靚酒，呢種予人方便嘅生意頭腦，正正就係扮嘢文嘅成功之道，蘭桂坊如是，海洋公園亦如是。
尋佳釀重質不重量
扮嘢文每日工作十幾小時，每月在泰國、香港、成都三地輪住飛，當然忙碌嘅中環人唔止佢一個，但辛苦搵來自在食，美酒佳餚永遠都係減壓良方。隨着香港紅酒免稅成為集散地後，紅酒生意做得愈來愈成功，盛智文就睇準時機帶同囝囝一齊打造蘭桂坊紅酒王國，開設網上「LKF Wines」。
LKF Wines網上酒窖會為忙碌嘅客人精挑細選限量版靚酒，講明重質不重量，所以扮嘢文只會視開業第一年為學習期，預咗利潤不佳，但可以看看客人嘅口味同意見，仲會大搞試酒會同工作坊，務求為客人搵到特別、甚至係獨一無二嘅靚酒，同時又尋找一啲低調而高品質酒莊靚酒帶到香港及內地。
不過，扮嘢文滴酒不沾，又點為客人推介好嘅紅酒呢？佢好坦白咁話自己對品酒認識的確唔多，但係呢個缺點正係佢哋開設網上酒窖嘅重點，因為佢哋會將識酒同愛酒之人帶到網上平台，為愛酒之人大開方便之門，同時紅酒亦會供應畀佢旗下蘭桂坊逾十五間餐廳及酒吧，可謂肥水不流別人田。
卓妮同扮嘢文傾開，發現佢好注重健康生活，平時最愛係日本菜，事關日本菜講究新鮮食材，清淡又美味，賣相亦吸引，所以佢每次幫襯旗下Tokio Joe日本餐廳，都必食枝豆、和風番茄、蝦沙律及壽司，夠晒健康。近年佢更開始實行半素食，平時又勤做運動，唔煙唔酒，想唔健康都幾難喇！
卓妮