政情：議員感慨銀行變晒質
歷時四日、合共四十八個小時嘅立法會長命會議，尋日以保險界議員陳健波提出嘅推動個人理財教育議案通過作終結。唔少議員趁機懷舊一吓，講番以前銀行點樣鼓勵市民儲錢，然後感慨現時銀行以賺錢為先，倒轉頭鼓勵市民借錢，經營模式完全變晒質。
會計界代表陳茂波作出感性發言，朗讀出當年銀行鼓勵市民儲錢嘅廣告歌歌詞：「小莫小於水滴，漸成大海汪洋，細莫細於沙粒，漸成宇宙四方」，又話自己工作幾十年，先發現淨係儲錢唔夠，一定要有好嘅理財計劃，寄語身處金錢掛帥社會嘅年輕人，學懂正確嘅金錢價值觀。
工聯會王國興及潘佩璆亦有同感，興哥話以前「儲蓄可致富，節儉可興家」，時移勢易，取而代之係「卡冚卡，先使未來錢」嘅觀念。潘佩璆更加愈講愈㷫，事關銀行經常叫人借錢，年輕人唔夠錢結婚、擺酒、度蜜月都去借，總之乜都係「借借借」，結果搞到周身債。唔知潘議員以前結婚使唔使借錢呢？