中環出更：李文斌撐仁濟8萬投黑松露
白色情人節將至，令前晚嘅仁濟醫院周年慈善餐會添上浪漫氣氛，仁濟主席以至一班總理雙雙對對到場做善事，除咗有影皆雙嘅副主席李文斌（Edmond）同太太Amanda外，就連平時低調嘅主席董吳玲玲夫婿董中浩都出鏡力撐珠光寶氣嘅太太，夠晒甜蜜。將於下月接任做仁濟主席嘅Edmond，尋晚豪花八萬元投得一公斤意大利冬季黑松露，善心滿瀉。
Edmond未上場已滿肚大計，計劃開設牙科診所、安老院及中醫痛症中心，仲會推行為期三年嘅環保計劃。Edmond對仁濟咁有心，皆因佢嘅美滿家庭係由仁濟所撮合，話說當年Amanda參加仁濟每年一度嘅「海外學生仁濟夜」，同當時仲係總理嘅李文斌邂逅。卓妮問Edmond係咪對老婆一見鍾情，佢就好怕醜即時攞起酒杯話要去敬酒，相當可愛。
王賢訊係Edmond媒人
唔講唔知，原來Edmond夫婦嘅媒人係現任總理王賢訊，下個月就輪到王賢訊自己小登科，所以前晚拖埋靚靚未婚妻Vincci出席。王總理話，佢同Vincci、Amanda都係美國南加洲大學嘅同學。恩恩愛愛嘅仲有前主席嚴玉麟及現任總理太太嚴徐玉珊，仲有《米蘭站》老闆姚君達夫婦，姚老闆對《米蘭站》上巿一事笑而不語，只係話籌備當中，無可奉告喎。
慈善晚會高潮莫過於拍賣環節，除咗Edmond投得一公斤意大利冬季黑松露外，董吳玲玲捐出嘅全球限量版「Chateau Mouton Rothschild 2000」，最終亦以二十八萬元成交，全晚共籌得二百九十萬元。不過，卓妮覺得如果民政事務局常秘楊立門肯開金口唱歌嘅話，善款一定再創新高，但佢謙稱無準備，仲笑笑口話希望大家唔好起哄叫佢唱歌喎！
卓妮