政情：吳文華放棄貓紙計劃
係人都知立法會秘書長吳文華（Pauline）力求革新，事事要做到最足，不過就唔係次次都有人欣賞，好似秘書處為議員預備議案辯論參考資料嘅「貓紙計劃」咁，本來係等佢哋發言時有嘢揸手，點知試驗三個月，發現冇人幫襯，尋日正式宣布失敗，以後都唔再搞。
議員有彈冇讚
其實秘書處推出「貓紙」服務以嚟，議員們一直有彈冇讚。有黨派認為預備自己嘅發言資料係議員基本責任，覺得秘書處做嚟多餘。加上服務一推出就觸礁，辯論「釋放劉曉波」議案嘅貓紙只得短短一版紙，比同日辯論嘅「制訂動物友善政策」少三頁，甚至冇提到劉曉波入獄關鍵嘅《零八憲章》，畀泛民鬧爆自我審查，而之後「辛亥革命一百周年」辯論亦落得同樣下場，做咁多嘢仲畀人鬧，都咪話唔慘。
既然冇人欣賞，大家都做得冇癮，立法會尋日嘅通告指出，調查發現只得好少議員會用秘書處嘅貓紙服務，就算議員助理都冇將資料充分利用，所以決定取消計劃，將人力用喺其他方面。