政情：蔡菜子期待中東之旅
將今年定為精彩旅遊年嘅前立法會議員蔡素玉（蔡菜子），上月去完廣西自駕遊後，又計劃喺四月底前往中東約旦、敍利亞及黎巴嫩旅行。不過，突尼斯「茉莉花革命」引發嘅「中東波」未知何時結束，中東多國反政府示威釀成局勢緊張，其中約旦及敍利亞兩國已被港府發出黃色外遊警示，黎巴嫩更被列為紅色外遊警示，睇嚟蔡菜子嘅中東之旅真係凍過水。
盼局勢快平定
蔡菜子無奈話，已經支付咗過萬元團費，現時正密切留意當地局勢發展，但佢好樂觀期望中東局勢喺四月底前平定下來。講番蔡菜子嘅中東之旅，原來係同埋六十名港大校友一齊去，當中包括港大專業進修學院院長李焯芬，睇陣容同聲勢就知呢個團似去考察古蹟多過遊埠歎世界，梗係啦，淨係約旦佩特拉古城（Petra）嘅古羅馬商旅歷史已經有排講喇。
雖然中東局勢令蔡菜子好憂心，但一講起今次旅程就相當興奮，佢話原本有近百人報名參加呢個中東團，但因為機位有限，最終只能接受六十人參加，但計起來都等於兩個旅行團㗎，所以如果唔成行都幾大件事。