政情：騰雞美華「大禮」餞別發叔

港府署長級官員係區議會稀客，所以尋日騰雞美華、勞工處處長卓永興及食環署署長梁卓文以晒冷式現身屯門區議會，自然觸動各黨派議員神經。多個政黨尋日一早已動員喺區會外示威，但騰雞美華最後以冇預先通知為由拒絕現身接信，令一班示威人士極為不滿。

有份示威嘅民建聯議員陳雲生期間突然社民連上身，懶理阻止，激動到率領一眾示威者入會議室高調踩場，狂踩騰雞美華，仲高呼「連我哋保皇黨都頂你唔順」，即使發叔出面調停亦不賣帳，搞到發叔無奈終止會議，等班示威者向騰雞美華遞信後才恢復會議。呢班建制派議員平時好哋哋，今次班高官同傳媒一到就現形，相信發叔同騰雞美華都始料不及。

雖然騰雞美華嘅出現鬧出呢個小風波，但佢喺席間確有交出百分之百誠意擦發叔鞋。早於八十年代喺區域市政局已同發叔交手嘅佢，發言時不只一次讚屯門區會喺發叔領導下做得「非常好」、「極之好」、「成績做到誇啦啦」，雖然氹得發叔笑逐顏開，但就聽到旁人打晒冷震，騰雞美華都算唔話得嘞。

發叔尋日亦喺會上向一眾共事多年嘅同僚發表「告別演說」，話做人「適當時候做適當嘅事」，自己一直有思量幾時退位讓賢。佢又提起，有位朋友送佢一首由歐陽修題嘅詞《玉樓春》，詞道：「直須看盡洛陽花，始共春風容易別。」發叔笑言，雖然屯門冇洛陽傾國傾城嘅牡丹花，但對佢呢個生於斯長於斯嘅屯門人，自有其馨香動人之處，仲話立法會財委會近日批出用作研究荃灣同屯門鐵路嘅撥款，係佢最佳嘅退休禮物喎。

劉皇發轉戰直選？

發叔又好感慨咁話：「青山長在，綠水常流」，與各位同事「再見亦是朋友」。卸任區會主席後，發叔話會陪多啲屋企人，仲笑言唔排除下屆轉玩直選添，真係信不信由你。