中環出更：顏太演繹小鳳仙皮褸
中華廠商會副會長兼美昌集團副總裁顏吳餘英稱得上事業型女強人，任何時候見佢都流露着一股成熟穩重嘅風格，衣着方面絕對幫上佢好大忙。卓妮早前喺一個廠商會活動上遇到顏太，佢身穿一套繡工精緻嘅小鳳仙真皮上衣及窄身皮褲，手挽搶眼鮮紅色Hermes手袋，爽朗中見秀氣。
親自設計 獨一無二
細問之下，原來套衫係顏太親自設計，然後搵相熟嘅裁縫度身訂造，獨一無二。顏太話，佢好鍾意着唐裝衫，以前幫襯開城中知名嘅中式服飾店，但後來覺得中式衫除咗絲綢之外，都應該有其他選擇，於是親自設計出中國古典美嘅繡花小鳳仙衣領，運用喺形象前衞嘅黑色皮衣上，再襯埋條黑色皮褲，冬天着住既保暖又夠特別。
顏太好滿意自己嘅傑作，所以一着多年，難得佢身形keep得咁好。當日顏太特登襯咗個顏色鮮艷嘅Hermes手袋，原來個袋係老公喺去年母親節送畀佢嘅禮物。卓妮記得去年初見顏太都挽住囝囝送嘅Hermes手袋，今年就輪到挽老公送嗰個，幸福真係莫過於此。
卓妮