政情：葉劉摷人辦鞭笞財爺
預算案「派糖」小恩小惠，惹嚟全城圍攻，新民黨正、副主席葉劉淑儀同田北辰前日一等鬍鬚曾喺立法會讀完份預算案，即刻落區搜刮「人辦」個案，睇吓邊啲階層插得預算案最勁。葉劉鞭笞高官，果然係不遺餘力。
fb貼相分享「罪證」
新民黨嘅facebook尋日下午貼咗一輯相，相中嘅葉劉手執預算案，喺街邊同街坊雞啄唔斷，我哋問葉劉所為何事，原來佢哋拎住鬍鬚曾呢本「罪證」，四圍去搵「苦主」，聽吓街坊點樣勁插預算案。葉劉引述相中嘅灣仔茶餐廳老闆娘稱，預算案完全幫唔到街坊手，通脹嚴重，食材價格飆升，以生粉為例，由每包一百幾蚊加到三百幾蚊，舖租又狂升，營運壓力百上加斤，但係預算案對佢哋嘅困境視若無睹，只係識做派綜援「雙糧」等小恩小惠措施，令人失望。
老闆娘同葉劉傾到七情上面，睇嚟佢對預算案真係好火滾，葉劉搵到呢個「人辦」個案，嚟緊要插鬍鬚曾應該都理直氣壯啲。